MEER OOR ONS

Die hartklop van ons plaashuis en lekker tuin is natuurlik die maats en dan ook die toegewyde span wat deur uitnodigende onderwys die wêreld speel-speel help ontsluit vir elke leerder.

ONDERWYSERS

Ons is baie gelukkig om Jeanine, Marlene, Noma, Vernanda en Chrisline  as juffrouens te hê.  Hul leef daagliks hul kreatiwiteit, passie en entoesiasme vir kinders en opvoeding  in hul onderskeie klasse uit. Die doelwit is om ‘n leerder-onderwyser ratio van 1:10 vir die groter klasse,  1:7 vir die twee tot drie jariges en 1:5 vir die een tot twee jariges te handhaaf. Dit mag soms ietwat varieer maar solank syfers dit toelaat, sal dit die reël wees.

ASSISTENTE

In elke klas is daar wonderlike dames. Almal van hul is self mammas en het ‘n voorliefde vir en slag met kinders.  Celeste en Filicia is in beheer van die kombuis en maak ook seker die skool is skoon en netjies – hul is ons regterhand! Ons personeel voldoen aan alle voorvereistes vir skoolregistrasie, soos gestel deur die Departement Sosiale Werke.  Ons glo ook in die ontwikkeling van, en investering in, personeel – dus is deurlopende indiensopleiding en kursusse gereeld op die agenda.

REGISTRASIE EN AFFILIASIES

Die skool het reeds sy registrasie by die Departement van Sosiale Werke afgehandel. Ons is ook by die Vereniging vir Voorskoolse Opvoeding en Sorg (VVOS) geaffilieerd – wat verseker ons woon relevante werkswinkels by en bly deurlopend op hoogte van industrie nuus en verwikkelinge.

DIE EIENAARS: SUZAAN EN HUGO CARINUS

Steggies se oorsprong was Suzaan se stille begeerte om hul eersteling, Johan, in ‘n gemaklike, geen fiemies, maar goeie moedertaalskool op ‘n plaas te kon hê. Iewers buite die stad se gewoel en druk; ‘n veilige, karaktervolle plek waar hy kan kindwees en soveel as moontlik vryheid – binne grense natuurlik – ervaar.